Ang ‘Padrino System’ sa Customs; Congrats, District Collector Zurbito!

PAANO raw ba mawawala ang ‘Padrino System’ sa Bureau of Customs (BoC)? Isang paraan ay gumawa ng batas laban dito.

Another way, na ginawa noong 2013 ni Sen. Chiz Escudero, ay imbestigahan ang mga padrino ng mga korap na opisyal ng Aduana.

Sa ating mga senador: Baka nais nyo pong umpisahan ulit ang imbestigasyon laban sa mga padrino sa Customs?

Hindi matitigil ang corrupt practices sa Aduana kung ang padrino system ay mananatili sa Customs.

***

Isa sa pinakamahalagang sangkap ng isang mahusay na institusyon ay ang kakayahang mapanatili ang maayos na takbo ng operasyon kahit may pagbabago sa pamunuan.

Ang tunay na lakas ng isang ahensya ay hindi nasusukat sa iisang lider lamang, kundi sa kakayahan nitong ipagpatuloy ang mga programa at reporma sa kabila ng pagpapalit ng mga opisyal.

Ito ang ipinakita kamakailan ng Bureau of Customs – Port of Zamboanga sa isinagawang turnover ceremony para sa bagong District Collector na si Atty. Manuel O. Zurbito Jr., na pormal na humalili kay District Collector Elenita A. Abaño.

Bagama’t bahagi ng normal na takbo ng serbisyo publiko ang pagpapalit ng mga namumuno, mahalaga pa ring kilalanin ang naging ambag ng mga opisyal na naglingkod nang buong husay.

Sa panahon ni Collector Abaño, lalo pang pinatatag ang customs enforcement, pinahusay ang ugnayan sa mga stakeholder, isinulong ang trade facilitation, at napaangat ang operational performance ng Port of Zamboanga.

Hindi madaling pamunuan ang isang pangunahing pantalan na may malaking papel sa kalakalan at seguridad ng bansa.

Kaya nararapat lamang ang pagkilala sa mga programang kanyang naipatupad at sa pundasyong kanyang iniwan.

Kasabay nito, malaki rin ang inaasahan sa bagong District Collector na si Atty. Zurbito.

Hindi lamang pagpapatuloy ng mga nasimulan ang kanyang haharapin, kundi ang higit pang pagpapalakas ng revenue collection, border protection, trade facilitation, at pakikipag-ugnayan sa iba’t ibang sektor.

Ang Port of Zamboanga ay isa sa mahahalagang daungan sa timog ng bansa. Bukod sa pangongolekta ng kita para sa pamahalaan, mahalaga rin ang papel nito sa pagpigil sa smuggling, paghadlang sa pagpasok ng mga kontrabando, at pagpapadali ng lehitimong kalakalan.

Kaya ang pagpapatuloy ng mahusay na pamamahala rito ay may direktang epekto sa ekonomiya at pambansang seguridad.

Sa huli, ang maayos na turnover ng liderato ay hindi lamang seremonyal na pagpapalitan ng posisyon. Isa itong malinaw na mensahe na ang institusyon ay mas mahalaga kaysa sa sinumang indibidwal.

Sa Bureau of Customs (BOC), ang pagbabago ng liderato ay hindi dapat maging dahilan upang mabalam ang mga serbisyo. Sa halip, ito ay pagkakataon upang magdala ng mga bagong ideya at dagdag na sigla sa pagpapatuloy ng mga repormang sinimulan ng ahensya.

Kapansin-pansin na sa ilalim ng pamumuno ni Commissioner Ariel F. Nepomuceno, patuloy na isinusulong ng Bureau ang Integrity, Accountability, and Modernization (I AM) Agenda.

Layunin nitong gawing mas episyente, mas tapat, at mas moderno ang operasyon ng Customs—mga prinsipyong mahalaga upang mapanatili ang tiwala ng publiko at ng mga stakeholder.

Habang may malinaw na direksiyon, mahusay na koordinasyon, at iisang layunin, magpapatuloy ang BOC sa pagtupad sa mandato nitong pangalagaan ang hangganan ng bansa, paigtingin ang koleksiyon ng kita, at maghatid ng serbisyong karapat-dapat sa bawat Pilipino.

(Para sa inyong mga suhestyon, reaksyon at opinyon ay sumulat o magmensahe sa bampurisima@yahoo.com).